Նախագահ Դոնալդ Թրամփը հայտարարում է, թե կորոնավիրուսի դեմ պայքարում ԱՄՆ-ը պատրաստ է օգնել Հյուսիսային Կորեային, Իրանին ու օգնության կարիք ունեցող այլ երկրների: Նրա խոսքերով, ԱՄՆ-ի զինված ուժերի գլխավոր բժիշկը շատ հաճախ է այս օրերին զրուցում այլ երկրների պաշտոնատար անձանց հետ:

Կոնգրեսը մարտի սկզբին համաձայնվել էր ութ միլիարդ դոլար հատկացնել որպես արտաքին օգնություն: Սակայն մինչ այժմ փոխանցվել է միայն մեկ միլիարդը:

Ինչպես Միջազգային եւ ռազմավարական հետազոտությունների կենտրոնի աշխատակից Ստիվըն Մորիսոնն է ասում, ‘’300 միլիոն դոլարը փոխանցվել է USAID-ի միջոցով: Հատկացումները կատարվել են ցածր եկամուտ ունեցող, խոցելի պետություններին’’:

Ինչ վերաբերում է տնտեսության խթանիչ ծրագրի համար նախատեսված 1 տրիլիոն դոլարին, այն չունի արտաքին օգնության նպատակ:

Ինչ վերաբերում է Չինաստանին, որին մեղադրում էին հիվանդության տարածումը կանխելու գործում դանդաղկոտության մեջ, այսօր տարբեր ընկերությունների միջոցով վաճառում կամ նվիրաբերում է թեստավորման պարագաներ, առողջապահական սարքավորումներ ու դեղամիջոցներ ու դրանք ուղղում դեպի Եվրոպա եւ հատկացնում Աֆրիկայի բոլոր 54 երկրներին:

Ինչպես Ուիլսոնի կենտրոնի վերլուծաբան Ռոբերտ Դելին է ասում, ‘’Կորոնավիրուսի միջոցով Չինաստանն այսօր ունի բարի կամքի դրսեւորման լավ հնարավորություն: Եվ դա այն պատճառով է, որ այս հարցում ավելի անարդյունավետ են գործում Եվրոպան ու Միացյալ Նահանգները’’: Նրա խոսքերով, սա ոչ միայն չինական մտահոգիչ ակտիվության մասին է, այլ նաեւ ամերիկյան ոչ ակտիվության ու ղեկավարի ղեկը թողնելու հանգամանքի: ‘’Իսկ սա ամենամտահոգիչն է’’, ասում է նա:

Ինչպես Առողջապահության համաշխարհային կազմակերպությունն է տեղեկացնում, համաճարակի տարածման արագությունը մեծանում է: Կազմակերպությունը կոչ է անում Մեծ քսանյակի երկրներին զարկ տալ առողջապահության բնագավառի աշխատակիցների համար նախատեսված անհատական պաշտպանական սարքավորումների արտադրությանը:

https://www.amerikayidzayn.com/a/5343248.html