Արցախի Պաշտպանության բանակը թիրախավորում է Ադրբեջանի բացառապես ռազմական օբյեկտները: «Արմենպրես»-ի փոխանցմամբ` այս մասին հոկտեմբերի 5-ին հայտնեց ՀՀ Պաշտպանության նախարարության ներկայացուցիչ Արծրուն Հովհաննիսյանը՝ հերքելով ադրբեջանական ապատեղեկատվությունը:

«Այսօր առավոտյան Ադրբեջանի Զինված ուժերը սկսեցին Արցախի բնակավայրերի մասսայական հրթիռակոծությունը: Արցախի ՊԲ-ն համապատասխան պատասխան է տալիս Ադրբեջանի գործողություններին` թիրախավորելով բացառապես ռազմական թիրախները: Այս առումով ապատեղեկատվություն են բոլոր մեղադրանքները, որոնք ուղղված են հայկական կողմին»,- ասաց Հովհաննիսյանը:

Արծրուն Հովհաննիսյանը նշեց, որ այսօր կայացած և շարունակվող մարտերի ընթացքում հակառակորդը մեծ կորուստներով հետ է շպրտվել:

Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվել են նաև խաղաղ բնակավայրերը, այդ թվում մայրաքաղաք Ստեփանակերտը, ինչի հետևանքով Արցախի տարբեր շրջաններում զոհվել են քաղաքացիական անձինք: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները, որի արդյունքում Վարդենիսի շրջանում սպանվել է 1 քաղաքացիական անձ և այրվել է քաղաքացիական ավտոբուս` Ադրբեջանի ԶՈՒ-ին պատկանող ԱԹՍ-ի հարվածից: Հայտնաբերվել են փաստեր՝ Թուրքիայի ներգրավվածության վերաբերյալ: Սեպտեմբերի Թուրքիայի F-16 կործանիչը ՀՀ օդային տարածքում խոցել է հայկական ռազմաօդային ուժերի ՍՈւ-25 գրոհիչը, զոհվել է օդաչուն: Հոկտեմբերի 1-ին հակառակորդը հրետանի էր կիրառել Գեղարքունիքի մարզի Շատվան գյուղի ուղղությամբ, ինչպես նաև հարվածային ԱԹՍ-ից հրթիռ էր արձակել Մեծ Մասրիկ բնակավայրի վրա, ինչի հետևանքով զոհվել էր մեկ քաղաքացիական անձ, երկու քաղաքացիական անձ ստացել էր տարբեր աստիճանի վիրավորվում։

Նորայր Շողիկյան

https://armenpress.am/arm/news/1030469.html