Ըստ ռազմական գերատեսչության տարածած վերջին հաղորդագրության. - «Ժամը 17:30-ի դրությամբ իրադրությունն առաջնագծում հարաբերականորեն կայուն է»:

Այսօր առավոտյան 7:50-ից է իրադրությունը լարվել Վարդենիսի Սոթք, ավելի ուշ Նորաբակ գյուղերի դիրքերում։ Ըստ պաշտպանական գերատեսչության՝ Ադրբեջանը ինտենսիվ կրակել է հրաձգային զենքերով նաև ականանետով։ Կրակի ինտենսիվությունը 3 ժամ անց նվազեց, հետո վերսկսեց նաև անօդաչուների կիրառմամբ՝ Սոթքից բացի, Նորաբակի ուղղությամբ։

Այդ ընթացքում, ըստ պաշտոնական հաղորդագրության, Բաքուն Սոթքի հատվածում ռազմական լրացուցիչ տեխնիկա ու անձնակազմ էր կուտակում։ Բաքուն հերքեց՝ պնդելով, թե հայկական կողմն է մեծ քանակությամբ զենք, ռազմական տեխնիկա կենտրոնացնում։ Հայաստանի պաշտպանության նախարարությունը հրապարակեց տեսանյութ՝ որում Ադրբեջանի զինտեխնիկայի ակտիվ շարժ է:

Պաշտոնական Բաքուն առավոտից հայկական կողմին զուգահեռ ժամանակագրությամբ հերքումներ է տարածում՝ մեղադրելով իրենց դիրքերի ուղղությամբ կրակելու, ընդհուպ հարվածային անօդաչու կիրառելու համար։ Երեք վիրավոր զինծառայողի մասին են հայտնում։

Գեղարքունիքի մարզպետի տեղեկացմամբ՝ բնակչության տարհանման հարց առայժմ չկա

Սահմանի այս մարտերը դիրքային հատվածում են, կրակոցների միայն ձայներն են հասել Վարդենիսի Սոթք։

«Բնակավայրերում հանգիստ է, ոչ մի խուճապ չկա, բնակավայրերի ուղղությամբ կրակոցներ չեն եղել», - ասաց Գեղարքունիքի մարզպետ Կարեն Սարգսյանը:

Հաշվի առնելով հանգամանքը, որ ադրբեջանական զինուժի կուտակման մասին է հայտարարվել, արդյոք քննարկվել է բնակչության տարհանման հարցը։
Գեղարքունիքի մարզպետի տեղեկացմամբ՝ առայժմ ոչ:

«Վիճակը կգնահատենք, կհասկանանք, բայց մինչև էս պահի դրությամբ նման խնդիր չկա, նման խնդիր դրված չի, դպրոցները աշխատում են», - նշեց մարզպետը:

Առավոտյան կրակոցներին զուգահեռ Սոթքի դպրոցում այսօր սեպտեմբերմեկյան միջոցառմամբ դիմավորել են 14 առաջին դասարանցիների։ Համայնքապետ Սևակ Խաչատրյանն ասաց. - «Սոթքում էս պահին հանգիստ է, սեպտեմբերմեկյան միջոցառումն ամբողջովին կատարվել է դպրոցում, մարդիկ էլ էս պահին իրենց բերքահավաքով են զբաղված»:

Սոթքի բնակիչներից Գրիգոր Դանիելյանը երեխաներին դպրոց էր տարել ու շտապել ցորենի դաշտ. - «Կոնկրետ դաշտում քաղ էինք անում, լսում էինք կրակոցներ, բայց խանգարելը... Աստված չանի, դե որ խանգարի թողնելու ենք գնանք էլի»:

Այս պահին կրակոցների ձայներ Սոթք չեն հասնում, հանդարտվեց, խաղաղ գիշերվա հույս ունի Սոթքի բնակիչներից Վարդանուշ Վարդանյանը։ Գյուղից տարհանում թեպետ չի եղել, բայց ասում է՝ կանայք, երեխաներ, շատերը Վարդենիս գնացին, մինչև...

«Կանայք, երեխաները, երևի 50 տոկոսը գնացել են, ամենքը իրանց էրեխեքին մեքենայով տարան, որովհետև լացում էին», - ասաց Վարդանուշ Վարդանյանը:

https://www.azatutyun.am/a/32574424.html