Pfizer ընկերությունը հայտնել է, որ կորոնավիրուսի դեմ BioNTech-ի հետ համատեղ պատվաստանյութի կլինիկական փորձարկումներն ավարտել են։

Պատվաստանյութի արդյունավետությունն սպասված 90 տոկոսից ավելի բարձր է գնահատվել՝ 95 տոկոս։ Ավելի քան 43 հազար կամավորներից, որոնք մասնակցել են կլինիկական փորձարկումների երրորդ փուլին, կորոնավիրուսով են վարակվել 170-ը:

Կորոնավիրուսի դեմ պատվաստանյութի ավելի քան հարյուր փորձանմուշ է մշակվել։ Այս պահին առաջատար է համարվում նաև ամերիկյան Moderna ընկերության դեղամիջոցը, որի արդյունավետությունը գնահատվում է 94,5 տոկոս:

Բրիտանական AstraZeneca-ի և Օքսֆորդի համալսարանի կողմից մշակված պատվաստանյութը ուժեղ իմունային պատասխան է տվել մեծահասակների մոտ` հույս տալով, որ այն կարող է պաշտպանել ավելի խոցելի խմբերի:

Միջին փուլի փորձարկումների տվյալները ենթադրում են, որ 70-ից բարձր տարիքի անձինք, ովքեր COVID-19-ով մահվան ավելի մեծ ռիսկի տակ են, կարող են ամուր պաշտպանություն ձեռք բերել հիվանդության նկատմամբ:

Oxford-AstraZeneca համատեղ մշակված պատվաստանյութի թեկնածուն, որը կոչվում է AZD1222 կամ ChAdOx1 nCoV-19, եղել է աշխարհի առաջատարների շարքում վիրուսից պաշտպանվելու համար:

Սակայն մրցակցող դեղագործներ Pfizer-ը, BioNTech-ը և Moderna-ն վերջին 10 օրվա ընթացքում առաջ են անցել` հրապարակելով վերջին փուլում գտնվող COVID-19 պատվաստանյութերի փորձարկումների տվյալները, որոնք ցույց են տալիս ավելի քան 90% արդյունավետություն:

Ի տարբերություն Pfizer-ի,BioNTech- ի և Moderna- ի, որոնք էլ օգտագործում են նոր տեխնոլոգիա, AstraZeneca-ի փորձնական պատվաստանյութ պատրաստված է շիմպանզեների մոտ հայտնաբերված սովորական մրսածության վիրուսի թուլացած նմուշից:

AstraZeneca- ն կնքել է մատակարարման և արտադրության մի քանի գործարքներ աշխարհի ընկերությունների և կառավարությունների հետ, քանի որ մոտենում է իր վերջին փուլի փորձարկումների արդյունքների հաղորդմանը:

ԱՄՆ Սննդամթերքի և դեղերի վարչությունը երեքշաբթի օրը հայտնեց, որ հաստատել է տնային օգտագործման առաջին COVID-19 ինքնաստուգման թեստերը, որոնք արդյունք են տալիս 30 րոպեի ընթացքում:

«Իսկապես հիանալի է արագ թեստավորումը, որ արդյունքները կարող եք անմիջապես ստանալ, և այն թեստը, որը կարելի է առաջարկել հիվանդներին տանը»,-ասել է Sutter Health ախտորոշման բժշկական կենտրոնի տնօրեն դոկտոր Ջոն Չոուն:

Ըստ ԱՄՆ պաշտոնյաների՝ Pfizer-ի և Moderna-ի պատվաստանյութերը կարող են պատրաստ լինել ԱՄՆ-ում օգտագործման թույլտվության համար շաբաթների ընթացքում: Իսկ BioNTech-ի ղեկավարն ասել է, որ պատվաստանյութերի վերջնական հաստատումը հնարավոր է դեկտեմբերի կեսերին` իդեալական պայմաններում:

https://www.amerikayidzayn.com/a/5669288.html